राष्ट्रवादीचे विद्यमान खासदार विजयसिंह मोहिते-पाटील यांचे पुत्र रणजितसिंह मोहिते-पाटील यांनी मुख्यमंत्री देवेंद्र फडणवीस यांच्या उपस्थितीत भाजपमध्ये प्रवेश केला आहे. काल अकलुजमध्ये कार्यकर्त्यांशी संवाद साधून त्यांच्या पाठिंब्याने भाजपमध्ये प्रवेश करणार असल्याची घोषणा त्यांनी घोषणा केली होती. गरवारे क्लबमध्ये रणजितसिंह मोहिते-पाटलांचा भाजपमध्ये अधिकृत पक्षप्रवेश केला आहे.
मुख्यमंत्र्यांनी पाच वर्षात राज्य प्रगतीपथावर नेलं : विजयसिंह मोहिते-पाटील
विधानपरिषदेमध्ये सदस्य असल्यापासून भाजपबरोबर आपुलकीचं नातं निर्माण झालं होतं. मुख्यमंत्री देवेंद्र फडणवीस यांनी गेल्या पाच वर्षात राज्य प्रगतीपथावर नेलं. सर्व पक्ष, गटतट बाजूला ठेवत सर्वांची कामे केली. माढा, सोलापूरमधील सिंचन प्रश्न, रेल्वेचे प्रश्न, पासपोर्ट कार्यालयाचे प्रश्नही सोडवले. केंद्रीय मंत्री नितीन गडकरी यांच्यामुळे विविध रस्त्यांची कामे झाली. राष्ट्रवादीत असून कामे कशी होतात अशी टीकाही त्यावेळी आमच्यावर झाली. कृष्णा खोरे स्थिरीकरण योजना असा एक प्रकल्प विजयसिंह मोहिते पाटलांनी मांडला होता. मात्र राष्ट्रवादीच्या काळात प्रकल्पाची चेष्टा करण्यात आली. मात्र गेल्या पाच वर्षात या प्रकल्पाला गती मिळत आहे, अशी माहिती रणजितसिंह मोहिते पाटलांनी दिली.
राजकारण हे शेवटच्या माणसाला लाभ देणारे असले पाहीजे. आम्हाला तुमच्याबरोबर काम करण्याची संधी दिली. त्यामुळे आता पुढे तुम्ही सांगाल ते राजकारण, समाजकारण करु, असंही रणजितसिंह पाटलांनी म्हटलं.
विजयसिंह पाटलांच्या आशीर्वादने रणजितसिंह भाजपमध्ये : मुख्यमंत्री
आज राजकारणातील एक महत्त्वाचा दिवस आहे. महाराष्ट्राचे राजकारण जे मोहिते-पाटील घराण्याशिवाय पूर्ण होत नाही, ज्यांनी राज्यात ठसा उमटवला, त्याच घराण्यातील तिसरी पिढी रणजितसिंह मोहिते-पाटलांच्या भाजप प्रवेशामुळे मोठं घराणं भाजपसोबत जोडत असल्याच आनंद आहे.माढ्यात खासदार भाजपचाच होईल, असं बोलून रणजितसिंह माढ्याचे लोकसभेचे उमेदवार असतील असे संकेत मुख्यमंत्र्यांनी दिले. विजयसिंह मोहिते-पाटलांच्या आशीर्वादने रणजितसिंह भाजपमध्ये आले असल्याचं सांगितलं. तसेच पुढची चर्चा आम्ही विजयसिंह मोहिते पाटलांसोबत करु असं मुख्यमंत्र्यांनी सांगितलं. विजयसिंह तिकडे आहेत की इकडे आहेत यापेक्षा ते मनाने इकडेच आहे, असं सूचक विधान मुख्यमंत्र्यानी केलं.
राज्यातील मोठी घराणी आता भाजपवर विश्वास दाखवत आहे. त्यामुळे भविष्याचा वेध घेऊन अनेक मोठे नेते भाजपमध्ये येत आहेत. विजयासाठी नवीन लोकांना संधी दिली पाहिजे. तसेच येत्या आठवडाभरता भाजपमध्ये आणखी लोक येतील, अशी प्रतिक्रिया गिरीश महाजन यांनी दिली.
रणजितसिंह भाजपमध्ये गेल्याने राष्ट्रवादी काँग्रेसचे अध्यक्ष शरद पवार यांच्यासाठी माढ्यात हा मोठा धक्का मानला जात आहे. माढ्यातील लोकसभा निवडणूक राष्ट्रवादीला जड जाण्याची शक्यता आहे.
